Основачот на „Амазон“ и најбогатиот човек на светот, Џеф Безос, објави дека ќе лета во вселената следниот месец со неговиот брат Марко во неговото вселенско летало „Blue Origin New Shepard“!
Летот во вселената беше најавен за 20 јули, 15 дена откако Безос поднесе оставка од функцијата извршен директор на „Амазон“.
Сон уште од детство
Во исто време, тоа ќе биде првиот лет на неговата компанија „Blue Origin“, што тој ја основаше во 2000 година.
Безос ја објави веста за летот во вселената во видео порака на Инстаграм.
– Од кога имав пет години, сонував да летам во вселената. Ќе одам на тој лет на 20 јули, заедно со брат ми. Најголемата авантура со мојот најдобар пријател. Отсекогаш сум сонувал за тоа – изјави Безос.
Интересно е што Безос најави заминување од „Амазон“ со цел да се посвети на својата компанија „Blue Origin“ и вселенските летови.
– Погледот од вселената кон Земјата ве менува, го менува вашиот однос со оваа планета. Земјата е единствена – изјави Безос на Инстаграм.
Според последните податоци, вредноста на имотот на Безос се проценува на 186,8 милијарди долари.
На патот кон вселената ќе има вкупно шест места, а покрај екипажот и браќата Безос, едно место е слободно.
Имено, тоа беше понудено на продажба, т.е. на аукција. Аукцијата трае до денеска и во моментов е највисоката понудена сума од три милиони долари.
Скоро 6.000 луѓе од 143 земји учествуваат на аукцијата. Парите заработени од продажбата на вселенското патување се наменети за Клубот за иднината, фондацијата на компанијата „Blue Origin“ на Безос.
Нулта гравитација
Планот за лет предвидува леталото да патува до работ на орбитата на Земјата на годишнината од слетувањето на Аполо 11 на Месечината, на висина од 100 километри од површината на нашата планета каде што е нулта гравитација, и да остане таму за десет минути пред да се врати на Земјата.
Ова ќе им овозможи на патниците да го искусат она што го имаат астронаутите на Меѓународната вселенска станица, каде има нулта гравитација.
Последниот час од аукцијата ќе се пренесува во живо на интернет, објави компанијата „Blue Origin“.
Ракетата Њу Шепард е лансирана во вселената 15 пати, именувана по Алан Шепард, првиот Американец што летал во вселената уште во 1961 година.