Русија го гледа како позитивен чекор фактот што американскиот мултимилијардер и извршен директор на Spacex, Илон Маск, претстави можен мировен договор за конфликтот во Украина, соопшти денеска Кремљ.
„За разлика од многу професионални дипломати, тој сѐ уште се обидува да најде начини за постигнување мир“, изјави портпаролот на рускиот претседател Дмитриј Песков.
Тој додаде дека Русија од самиот почеток „била за исполнување на нејзините услови преку преговори“.
„Да се постигне мир без исполнување на условите на Русија е невозможно“, заклучи Песков, јави Танјуг.
Кремљ ја пофали иницијативата на Маск неколку часа откако Киев го отфрли неговиот повик за пријателско решение на седуммесечниот конфликт на Русија со Украина.
Основачот на компанијата Spacex и ко-основачот на компанијата Tesla, американскиот мултимилијардер Илон Маск, на Твитер претставија предлог како да се запре војната во Украина.
Маск наведе четири точки на „украинско-рускиот мир“ и ги покани корисниците да го кажат својот став за нацртот.
Тој изјави дека е неопходно да се повторат изборите во регионите кои гласале за приклучување кон Русија, под надзор на Обединетите нации, па ако народот изрази волја Русија да си замине, нека биде.
Крим, како што напиша, формално останува дел од Русија, како што беше од 1783 година, односно до грешката на Никита Хрушчов.
Тогаш, како што наведе, треба да се обезбеди водоснабдување на Крим, додека Украина останува неутрална.
Маск ги покани корисниците на Твитер да гласаат за овој предлог.
Украинскиот претседател Володимир Зеленски му возврати на Маск откако сопственикот на Tesla објави анкета на Твитер со неговото мислење за завршување на војната во Украина.
Во својот одговор, Зеленски објави своја анкета, прашувајќи ги следбениците на Твитер дали повеќе им се допаѓа најбогатиот човек на светот додека ја поддржуваат Украина.
„Кој Илон Маск ви се допаѓа повеќе? Оној што ја поддржува Украина или оној што ја поддржува Русија“, напиша Зеленски.
Сите информации поврзани со најновите случувања со војната во Украина можете да ги прочитате ТУКА.