Данските власти ги предупредија бродовите да ги избегнуваат водите околу островот Борнхолм во Балтичкото Море, во радиус од пет наутички милји, поради истекување на гас од гасоводот Северен тек 2, а пад на притисокот е забележан и во Северен тек 1.
Германската влада соопшти дека е во контакт со данските власти и дека работи со локалните истражни органи за да открие што го предизвикало ненадејниот пад на притисокот во гасоводот, пренесува Ројтерс.
Планот беше „Северен тек 2“ да ја удвои испораката на руски гас за Германија преку Балтичкото Море, но Берлин го блокираше издавањето на работна дозвола поради рускиот напад врз Украина, наведува британската агенција.
Данската поморска управа вчера извести за истекување гас во близина на островот Борнхолм во Балтичкото Море, кој е блиску до неактивен руски гасовод Северен тек 2.
Диспечерот „Северен тек 2“ при преминот кон копното забележал ненадеен пад на притисокот на линијата А на гасоводот „Северен тек 2“, се вели во соопштението, во кое се истакнува дека е започната истрага и дека надлежните органи на Данска, Германија, Шведска , информирани се Финска и Русија.
Во понеделникот вечерта, операторот на гасоводот Северен тек 1, кој работеше со намален капацитет од средината на јуни, пред целосно да го прекине снабдувањето во август, исто така објави пад на притисокот на двете линии на гасоводот.
Претседателот на германскиот регулатор на мрежата, Клаус Милер, на Твитер објави дека поради падот на притисокот во двата гасоводи, „ситуацијата е неодржлива“.
Регулаторот рече дека во моментов не е познато што го предизвикало падот на притисокот, додавајќи дека настанот немал влијание врз безбедноста на снабдувањето во Германија и дека нивото на складирање на гас во земјата е околу 91 процент.
Гасоводот, кој требаше да го удвои обемот на гас што тече од Санкт Петербург под Балтичкото Море до Германија, штотуку беше завршен и наполнет со 300 милиони кубни метри гас кога Германија ја откажа употребата неколку дена пред рускиот напад врз Украина.