Најмалку 31 лице е убиено, а 40 повредени во тешките израелски воздушни напади во јужен и источен Либан, соопштија властите денес, откако Израел предупреди дека ги засилува операциите и покрај формалното примирје.
Либанското Министерство за здравство соопшти дека жртвите се резултат на нападите извршени вчера.
Напади во близина на езерото Караун
Либанските власти изјавија дека Израел извршил операции на други места во земјата, вклучувајќи три напади во близина на вештачкото езеро Караун југоисточно од главниот град Бејрут.
Управата на реката Литани предупреди на „катастрофални ризици за жителите, инфраструктурата и виталните објекти низводно“.
Караун е најголемото вештачко езеро во Либан, создадено од брана на реката Литани и игра клучна улога во снабдувањето со вода и електрична енергија во регионот.
Стравови од долгорочна окупација
Израелската армија утрово соопшти дека убила член на Хезболах во јужен Либан.
Откако Нетанјаху најави зголемени напади и проширување на копнените операции, во Либан растат стравувањата дека израелските сили би можеле да повратат делови од земјата за подолг период, како што правеа во 1980-тите и 1990-тите.