Градоначалникот на Општина Куманово Максим Димитриевски на денешната прес конференција по одржана седница на Штабот за заштита и спасување упати апел граѓаните да ги почитуваат мерките за заштита од коронавирусот, со оглед дека за една недела има 46 нови случаи на подрачјето на градот.
– На територијата на Општина Куманово во последните седум дена имаме 46 нови позитивни ковид случаи и затоа оваа прилика ја користам да ги повикам граѓаните да ги почитуваат мерките, особено мерките каде што имаме поголеми собирања на граѓани на едно место бидејќи ковид кризата е присутна, сѐ уште ја немаме искоренето и ние со непочитување на мерките само даваме поголема можност оваа пандемија да се шири, рече Димитриевски.
Куманово, вели Димитриевски, се соочуваше со многу потешки состојби по однос на ковид кризата.
– Сметам дека можеме оваа бројка од 46 да се обидеме да ја намалиме во следниот период доколку самите како граѓани бидеме максимално дисциплинирани, додаде тој.
Никола Ивановски