Новоизбраниот претседател на Чешката Република Петр Павел изјави дека на неодамна одржаниот форум за безбедност во Минхен разговарал со францускиот претседател Емануел Макрон за европската или армијата на Европската унија и дека се согласиле дека во овој момент тоа подобро е да се зајакне европскиот столб на НАТО.
Тој пред новинарите изјави дека европската одбрана не е прогласување армија на ЕУ, туку дека наместо тоа е подобро да се зајакне европскиот столб на НАТО, пренесува Еурактив.
„Веќе имаше голем потег на претседателот Макрон – од европската армија, за која зборуваше пред многу години, до сега кога рече дека треба да изградиме европска одбрана заснована на европскиот столб на НАТО. Тоа е разумна промена“, рече Павел.
Сепак, како што пишува бриселскиот портал, во говорите што ги одржал пред средбата со Павел, францускиот претседател ја истакнал потребата на Европа од команда независна од НАТО.
„Мораме да бидеме способни да дејствуваме со Европејците внатре или надвор од НАТО и, доколку е потребно, да обезбедиме командни способности што ќе ни овозможат да извршиме голема операција заедно“, рече Макрон на крајот на февруари оваа година.
Порталот, врз основа на своите наоди, додава дека за Франција е важно нејзината воена опрема и технологии да бидат интероперабилни со оние на САД, што значи дека НАТО е клучен елемент за Франција, и покрај претходните коментари на Макрон.
Како што рече Павел, Европа мора да ги има таканаречените „стратешки двигатели“ за да изврши каква било операција од големи размери без да зависи од поддршката на САД, а такви стратешки фактори се, како што рече, стратешки транспортни врски, логистика, стратешка комуникација, вклучувајќи сателити или стратешко разузнавање.
„Од овие способности Европа има минимум“, додаде Павел, кој некогаш беше шеф на воениот комитет на НАТО, пренесува Танјуг.
Тој посочи дека без стратешки двигатели „нема да стигнеме никаде со европската одбрана“.