Белорусија планира да премести воена опрема и сили во среда и четврток во, како што вели, антитерористичка вежба, поради стравувањата дека Русија би можела да изврши нов напад врз Украина од територијата на нејзиниот белоруски сојузник.
– Во тој период се планира преместување на воена опрема и персонал на силите за национална безбедност – ја цитира државната новинска агенција БелТА Советот за безбедност на земјата.
– Ќе биде ограничено движењето на граѓаните (сообраќајот) на одредени јавни патишта и површини, а предвидена е и употреба на оружје за обука – се наведува.
Нема информации за кои делови од земјата станува збор.
Белорусија соопшти дека нема да војува во соседна Украина, но претседателот Александар Лукашенко во минатото нареди војници да се распоредат со руските сили во близина на украинската граница, наведувајќи ги заканите за Белорусија од Киев и од Западот.
Белорусија и Русија формално се дел од „заедничката држава“ и се тесно поврзани економски и воено, при што Русија ја користи Белорусија како лансирна рампа за нејзината инвазија на Украина која започна на 24 февруари.
Зависноста на Белорусија од Русија се продлабочи откако поддршката на Москва му помогна на Лукашенко да го смири бранот немири по спорните избори во 2020 година.
Иако Лукашенко со години се спротивставуваше на руското воено распоредување во Белорусија, руските сили пристигнаа во земјата непосредно пред почетокот на инвазијата на Украина на 24 февруари и го започнаа својот неуспешен напад врз Киев од белоруска територија.
Во октомври Лукашенко најави ново распоредување на 9.000 руски војници во земјата како дел од новите заеднички воени сили на двете земји.
Украина со месеци предупредува дека стравува дека Белорусија и Русија би можеле да планираат нов упад преку северната граница на Украина.
Во соопштението објавено на Фејсбук во средата, украинскиот Генералштаб рече: „Непријателските трупи тренираат на полигоните на Република Белорусија“, а руските напади продолжија од белоруска територија.
Минатата недела рускиот министер за одбрана Сергеј Шојгу разговараше со својот белоруски колега Виктор Хренин за воената соработка.
Сите информации поврзани со најновите случувања со војната во Украина можете да ги прочитате ТУКА.