Американскиот претседател Џозеф Бајден го предупреди украинскиот претседател Володимир Зеленски дека „постои јасна можност“ Русија да ја нападне Украина во февруари, според Белата куќа.
– Сега тоа го кажа јавно, а ние за тоа предупредуваме со месеци – изјави Емили Хорн, портпаролка на Советот за национална безбедност, пренесе „Гласот на Америка“.
Русија рече дека има „мали причини да биде оптимист“ дека тензиите може да се смират во Источна Европа, бидејќи САД го отфрлија барањето за забрана на членството на Украина во НАТО, а Западот да ги повлече своите војници и оружје од земјите што граничат со Русија.
Рускиот министер за надворешни работи Сергеј Лавров изјави дека американскиот одговор не содржи ништо позитивно, но дека некои елементи може да доведат до преговори за секундарни прашања.
САД и европските земји ги отфрлија предлозите на Москва.
Лавров изјави дека официјално ќе достави предлози до Путин, потсетува „Гласот на Америка“.
Портпаролот на Кремљ Дмитриј Песков најави дека Москва брзо ќе одговори и „секогаш постои опција за продолжување на дијалогот, што е во интерес на двете страни“.