Популарноста на американскиот претседател Доналд Трамп во САД останува близу до најниската точка од почетокот на неговата политичка кариера, бидејќи голем дел од Американците очекуваат пораст на цените на бензинот поради војната со Иран, објави денес британската агенција Ројтерс резултатите од анкетата на Ипсос.
Околу 35 проценти од испитаниците изјавиле дека ги одобруваат постапките на американскиот претседател, што е исто ниво како и во претходната анкета во мај.
Овој резултат е само малку повисок од нискиот од 34 проценти достигнат во април, најнизок откако Доналд Трамп се врати во Белата куќа во јануари 2025 година.
За време на неговиот прв мандат, рејтингот на одобрување на Доналд Трамп падна на 33 проценти во декември 2017 година.
Се чини дека американскиот претседател ја плаќа цената за својата одлука да започне воен напад врз Иран, заедно со Израел кон крајот на февруари, што предизвика скок на цените на бензинот.
Иако цените на пумпи во Соединетите Американски Држави (САД) се намалија во последните недели, 59 проценти од анкетираните очекуваат трошоците да се зголемат во наредната година, во споредба со 17 проценти кои предвидуваат подобрување, додека останатите се неодлучни.
Само 22 проценти од анкетираните Американци ги одобруваат напорите на Доналд Трамп да ја заштити куповната моќ на домаќинствата, додека 70 проценти не ги одобруваат неговите постапки, се додава во анализата на резултатите од анкетата.