СЗО: Морбилите аларматно се шират низ Европа

Сподели со своите пријатели

Бројот на случаи на морбили во Европа во 2017 година порасна за 400 отсто во однос на претходната година, при што заболеле повеќе од 20.000 лица, од кои 35 починале, покажуваат податоците на Светската здравствена организација (СЗО).

Според СЗО, ваквите податоци се алармантни имајќи го пред вид рекордно нискиот број од 5.273 случаи во 2016 година.

Големи епидемии на ситни сипаници лани се регистрирани во 15 европски држави.

Најтешко погодена земја минатата година била Романија, каде се регистирани 5.562 случаи на морбили, по што следи Италија со 5.006 и Украина со 4.767 заболени.

Во Грција во 2017 година имало 967 заболени, во Германија 927, во Србија 702, во Таџикистан 649, Франција 520, Русија 408, во Белгија 369, Велика Британија 282, во Бугарија 167, Шпанија 152, Чешка 146 и Швајцарија 105.

Стручните лица сметаат дека дел од проблемот е што луѓето одбиваат вакцинација.

Иако една студија објавена во 2004 година за можна врска помеѓу ММР вакцината и аутизмот е побиена, таа заплаши некои луѓе и ја разниша довербата во вакцината.

Светската здравствена организација објави дека е забележано намалување на општата рутинска вакцинација, со инаку ниско покривање на „маргинализираните социјални групи”, како и прекини во снабдувањето со вакцина или несоодветни системи за контрола на болести.

Сузана Јакаб од СЗО вели дека секое ново лице инфицирано со малите сипаници во Европа потсетува дека невакцинираните деца или возрасни, без оглед каде живеат, остануваат на ризик да се заразат и да ја пренесат заразата и на други лица.

– Ова краткорочно назадување не може да не одврати од посветеноста да бидеме генерација која еднаш и засекогаш ќе ги ослободи нашите деца од оваа болест, вели таа./МИА

Leave a Reply