Специјалното јавно обвинителство на Република Македонија кое ќе го предводи Катица Јанева од денес започнува со својата дејност.
Првичните 14 јавни обвинители се намалени на бројка од 12, а како што вели Јанева таква одлука е донесена врз претходен заеднички постигнат договор измеѓу неа и Советот на обвинители.
Јанева заедно со Гаврил Бубевски, Ленче Ристевска, Трајче Пеливанов и Артан Ајро, сите од Основното јавното обвинителство-Скопје, Лиле Стефанова од Јавното обвинителство за гонење кривични дела од областа на корупцијата и организираниот криминал, како и Бурим Рустени, Елизабета Јосифовска, Лејла Кадриу, Љубомир Лапе, Марија Ѓорѓева, Стевчо Донев и Фатиме Фетаи од денес ќе работат на истражување на случајот со прислушкуваните материјали и автентичноста на содржината од истите.
Инаку не е исклучена можноста по затворање на овој случај Катица Јанева да ги превземе и останатите нерасветлени контроверзни случаи, меѓу кои и случајот од Диво Насеље.