03.01.2018 20:47

СДСМ и ДУИ на локално ниво во Куманово потпишаа Меморандум за соработка

loading...

Општинската организација на СДСМ Куманово и локалниот огранок на ДУИ, ќе коалицираат во општинскиот совет. Претседателот на општинската организација Мартин Костовски и советникот од ДУИ, Фатмир Идризи денеска потпишаа Меморандум за соработка што ќе трае наредните четири години.

СДСМ на локалните избори освои 16 мандати, а ДУИ три, така што со мнозинство од 19 мандати во советот, сметаат потписниците, ќе се овозможи реализирање на проектите ветени на локалните избори.

На потпишувањето на меморандумот присуствуваше и градоначалникот на Куманово Максим Димитриевски, во својство на член на СДСМ и имплементатор на одлуките што ќе бидат донесени на советот.

– Ќе работиме на унапредување и остварување на заложбите и програмските цели кои се ветени во кампањата за локалните избори и нормално, практицирање на власта со квалитетни кадровски решенија ќе направиме се, граѓаните да бидат задоволни од однесувањето од политиките на Колацијата на СДСМ и ДУИ, изјави Костовски.

Советникот од ДУИ, Идризи, рече дека ќе работат на остварување на ветеното во изборите, со цел поквалитен живот на граѓаните.

– Првенствено треба да се водиме од општите барања на граѓаните а потоа и од политичките барања, но она што е најбитно за јавноста е дека СДСМ и досега беше на локално ниво коалициски партнер со ДУИ и ќе продолжиме во позитивен тренд да даваме несебичен придонес за развој на Куманово во модерна и урбана целина, изјави Димитриевски.

 

 

Одговарајќи на новинарско прашање како ќе бидат распределени раководните функции на локално ниво, Димитриевски, рече дека во моментов, директорите на јавните претпријатија имаат тековни менаџерски договори и не сакаше да прејудицира за останатите функции и распределби на местата кој ќе ги пополни, посочувајќи на законските одредби и постапките за избор.

– Во овој политички договор во втор план се кадровските решенија, во прв план, се она што се ветувања кон граѓаните и подобрување на животните услови на сите наши сограѓани. Воедно, сакам да истакнам дека СДСМ е отворен за соработка со сите политички партии кои што во моментов учествуваат во делот на функционирање и работење на општинскиот совет, изјави Димитриевски.

Не сака, рече да шпекулира зошто се одолговлекувал овој политички договор, посочувајќи дека договорите можат и да се склучат и да не, а институциите мора да функционираат.

– Требаше да се усогласат одредени ставови и согледувања и секако дека кадровската политика има влијание во делот на договарањето, но не е под број еден по приоритет, рече Димитриевски.

Во советот на општина Куманово, вкупно има 33 советници.


© Крадењето авторски содржини е забрането со закон. Преземањето на текстови, изјави или фотографии во авторска сопственост на порталот Кумановски Муабети е дозволено делумно, со задолжителен хиперлинк до содржината која се пренесува.

Последни наслови

Facebook Comments