Осум лица се здобиле со телесни повреди во две сообраќајни незгоди кои се случиле утринава по 10 часот во кумановско, едната кај клучката за автопатот во Којнаре, а втората во населба Карпош.
Информацијата ја потврдија и од кумановската болница каде на повредените им била укажана лекарска помош.
На две одделни локации се имаат случено две сообраќајни незгоди и тоа во скоро исто време со многу мало временско растојание. Донесени се вкупно осум пациенти во едната има тројца повредени, во втората пет повредени, од кои ниту еден не е задржан на хоспитално лекување. Има еден тешко повреден во осумте пациенти кои ни се донесени со Итната медицинска помош и тоа со фрактура која конзервативно засега ќе се третира – изјави Стефан Трајановски, дежурен хирург при Општа Болница Куманово.
Како што информираат од СВР Куманово, една од сообраќајните несреќи се случила околу 11:35 часот кај .тн. Нато клучка, кога патничко моторно возило „Форд“ со француски регистарски ознаки, управувано од Х.И роден 1958 година, инаку државјанин на Турција, исклучувајќи се од автопатот кон магистралниот пат не дал првенство на минување на возило марка „Мерцедес“ со кумановски регистарски ознаки управувано од А.А. роден 1993 година при што директно удрил во него.
Сите повредени по укажаната лекарска помош се пуштени на домашно лекување.