Со грант од Јапонија во висина од 44.779 евра старите ќумбиња во Основното училиште „Браќа Миладиновци“ во Куманово во Соколана ќе бидат заменети со нов систем за греење, а ќе бидат набавени и нови прозорци.
Во дисперзираните паралелки учениците, наставничкиот кадар и техничкиот персонал повеќе од 50 години се затоплуваа со печките кои претставуваа голем проблем, бидејќи родителите секојдневно во зимскиот период реагираа дека децата им мирисаат на чад и дека не е доволно топло.
Програмата за мали грантови за човекова безбедност на Јапонија се спроведува 30 години во над 140 земји во светот. Грантот е дел од Официјалната развојна помош на Владата на Јапонија која обезбедува поддршка на земјите во нивното остварување одржлив социо-економски развој на локално ниво. Поддршката е наменета за јавни установи, како што се училишта и болници, но и други непрофитни организации.
Добитниците на грантовите за 2017 година, со имплементација во 2018 година, се 5 јавни здравствени установи и 4 општински основни училишта.
Јапонија ја спроведува програмата за мали грантови во Македонија од 1996 година, а доделената помош изнесува повеќе од 6 милиони евра. Со овие грантови, реновирани се повеќе од 60 училишта, набавена е опрема за 40 здравствени установи, а доделени се и повеќе од 20 специјализирани возила за јавните претпријатија. Во Македонија досега се доделени околу 420 милиони евра преку различни програми од Јапонија.