Кандидатите за градоначалник на Крива Паланка, Борјанчо Мицевски од Коалицијата за локални избори 2017 предводена од СДСМ и Арсенчо Алексовски од Коалицијата за локални избори 2017 предводена од ВМРО-ДПМНЕ денеска во Општинската изборна комисија Крива Паланка потпишаа Кодекс за фер однесување за време на кампањата.
Двајцата кандидати, Алексовски и Мицевски, порачаа дека ќе водат позитивна кампања, со промоција на проекти и програми за развој на општината.
Претседателот на ОИК, Душко Арсовски, рече дека принципите на демократијата и доброто владеење придонесуваат за развој на демократијата и градење доверба во изборниот процес во Република Македонија.
Граѓаните на Крива Паланка на локалните избори ќе одлучуваат и за нов состав на општинскиот Совет меѓу кандидати од три советнички листи: на Коалицијата предводена од СДСМ чиј носител е Елизабета Павловска, Коалицијата предводена од ВМРО-ДПМНЕ чиј носител е Игор Тодоровски и од Општински сојуз на Левица, Крива Паланка, со носител Јованче Маџовски.
Извор: МИА